Hapit na August, magklase na! Makatilaw na sad ta sa mga laming pagkaon sa Visca, samtang maglantaw sa makadasig nga hulagway ni kras. Ubanan pa gayud sa bugnaw nga hangin nga kusog mohalok sa atong mga amping. Makaingon gayud ta nga, mura naman ni og Kdrama pero dili lang ta singkit og mga mata.

Apan, naa gayuy mga pangutana nga kanunay gatuyok sa atong huna-huna karong panahona. Makabalik pa ba kaha ta? Pareha pa ba kaha sauna? Naa pa ba kaha adto ang pagkaon nga atong gipangita? Makatambay pa ba ta samtang gakaon-kaon sa atong paboritong pagkaon? O kutob na lang ba ni tanan sa atong mga imahinasyon?

Busa, magahinaot na lang kita nga kini dili ra kutob sa atong huna-huna kay arang kaanindot na gayud ipaharuhay sa tugkaran sa Visca, magalibot-libot sa arang kalunhaw ani nga palibot. Ug ang ato sang mga lagkot nga laway, di na gayud mapugngan nga modaliis, modaliis og hinay-hinay sa atong tigtagsa-tagsang mga ngabil

Kini bayang Visca adunahan sa mga nagkalain-laing mga laming pagkaon. Mga klase sa pagkaon nga wala gayuy makatupong kay ang lasa ug timpla, magpabilin gayud sa atong dila, nuot sa atong tutunlan hasta sa atong tiyan.

“Kalami na lang gayud ikaon!”

chocomilk_1.png

Gapangita na gayud akong tutunlan sa makabagtok sa utok nga Chocomilk tungod sa kabugnaw. Kanang feeling nga uhaw na kaayo ka, ubanan pa gayud sa init nga panahon ug makapaso nga sidlak sa adlaw. Pero bisan og arang kalayo sa market, baktason gayud na nato para lang makapalit sa chocomilk nga arang kafresh, katam-is ug kalami. Makahurot man tuod ta og lima, pero ang maafford sa allowance, kutob ra gayud sa usa. Hinaot, naay manglibre diha!

isaw1.png

Anaa pa gayud ning isaw nga di gayud nato malimtan og palit hilabi na kung gikan klase. Unsaon taman ning makakita pa lang ta sa sarsa, mangaslom nata sa kalami. Di pa gayud ta mahimuyo kung usa lang ang paliton, magbalik-balik pa gayud ta hangtud ang sensiyo nato mahurot.

pinaypay1.png

Sa unahan pud, madungog nato ang bulahang makatintal nga tingog ni Ate Braga, "Oy gwapa palit na!" Bisan galuha-luha nata sa kakuwang sa atong allowance ug gakamang na ang atong nagisi na nga pitaka, abtik gihapon ta mogasto, makapalit lang sa pinaypay niya. Kay kinsa man intawon ang di makapalit nga lami na, dasig pa ang tindera. Ubanan pa gayud sa mga storya nga walay katapusan. Usahay, mahurot na lang gayud nato ang pinaypay, naa pa gihapon ta sa iyang tindahan. Makamingaw sad ning kabanhaan ni Ate Braga!

banana_cue1.png

Sa tupad pud, naa ang ginanggang nga lami kaonon kadahapon. Kanang sakto pud inig uli nato gikan sa upper, manimaho na ang sinugbang saging. Human ang mga kamot nato diretso dayon kuot sa atong bulsa, tan-awon kung makaafford pa ba ta. Unya ug kuwang man gani, laban lang oy! Naa man sad atong barkada, andam mosalo. Andam magpabaylo og kwarta, unya dili na diay ilisan inig ka ugma. Wais gayud oy! Buhaton gayud tanan basta lang makakaon sa ginanggang.

ngohiong1.png

Apan, wala gayuy makalupig sa gaulbo sa kalami nga ngohiong sa nag-inusarang Green House. Ubanan pa gayud sa sauce nga makalangkat og simod sa kahalang. Unang tuslo palang, "Hoohh, arang kahalang, pero lami man maong laban!" Usahay, tungod sa sige og balik-balik, iusa na lang ang panihapon ug ang snack kay nahurot na ang badyet. Pero di man sad makabasol, kay makatagbaw man ang lasa bisan og makapurdoy!

puto1.png

Human inig muabot na ang hapon, dungan sa pagsalop sa adlaw og pagtingog sa mga gangis, madungog na nato ang makabungol nga tingog ni Borj na galibot-libot para ibaligya ang iyang with love nga 'Puto(synthesis)'. Tas lumbaay sad dayon ang mga estudyante og tapok para mopalit. Naa say uban kusog kaayo mohangyo, unya kay suki naman lagi, aw makahangyo gayud. Hilabi na og dyutay na lang ang mahabilin sa iyang mga puto(synthesis), makahangyo gayud ta ug usahay, makalibre pa!

balot1.png

Dungagan pa gayud sa balot ni Borj nga perfect kaayo kaonon inig mga alas otso na. Kanang bugnaw-bugnaw na ang panahon, busa ubay-ubay gayud ang mamalit, pampainit sa ilang gaugang gabie. Kay kinsa man gud ang dili manginit nga ang suka arang kaaslom, puno pa gayud og galutaw na mga sili. Unya ang balot, init-init pa. Makaingon gayud ta, "Bahalag single, basta makakaon og balot!"

Busa kamong mga preskong mga estudyante sa Visca, andama na gayud na inyong mga bulsa kay mabuslot gayud na nga wala sa oras tungod sa sige ra og kaka. Unsaon taman nga ang Visca, pagkaon dinhi, pagkaon dinha. Gasto dinhi, gasto dinha. Maong, lantawa ninyo ang mga gauna ninyo sa Visca, makakita gayud mo og mga banggiitan modala og kwarta! Kitang mga Viscan, dili lang ta kutob sa pagbaktas, banggiitan sad ta kung mag-estorya nata mahitungod sa kwarta. Mga wais gud ta!

Apan sa karon, antos-antos sa lang ta. Bahala na og kausapon na ang atong mga baba, makakaon ra lagi ta sa mga pagkaon nga atong gipangita. Makatambay ra sad ta sa atong tambayan kauban atong mga barkada. Ug makapatagad nasad ta sa mga klasmit og instructor nato nga kras nga bisan kanus-a dili gayud maatoa. Mahitabo ra lagi na puhon, antos-antos sa lang gayud ta karon. Makaburak ra lagi ta og kaka ug tagay ani! Gamay nga antos na lang, larga na ang tanan!
Pero aysa, andam naba ang pitaka nato? Basin mahulog na sad nga magpalibre ka sa barkada nimo? Utangan pa baya ka ato!

Amaranth Online Newsletter

Be part of our awesome online community!